Sumarvinna á fjöllum

Skrifað af: Atli Pálsson Mánudagur, 30. janúar 2012 09:57

Stjórn barst þetta erindi frá  Íslenskum fjallaleiðsögumönnum:

Íslenskri Fjallaleiðsögumenn auglýsa eftir leiðsöguefnum til að vinna í jökla- og fjallaleiðsögn sumarið 2012. 

Fjögurra daga nýliðaþjálfun fer fram í apríl.

ÍFLM er eitt öflugasta fyrirtæki landsins á sviði ævintýratengdrar ferðaþjónustu. Jöklaferðir eru þekktasta vara fyrirtækisins en stærstur hluti starfseminnar er þó þjónusta við ferðamenn í lengri gönguferðum. Þessar gönguferðir eru allt frá því að vera stuttar dagsferðir yfir í að vera 30 daga ganga þvert yfir Ísland og þverun Grænlandsjökuls á gönguskíðum.

Fyrir þá leiðsögumenn sem starfa í leiðsögn á jökum og fjöllum er rekið þjálfunarprógramm sem ekki á sinn jafningja hér á landi. Gerð er krafa um að leiðsöguefnin komi inn í nýliðaþjálfun með grunn í fjallamennsku og línuvinnu. Flestir ÍFLM leiðsögumenn hafa þennan grunn úr starfi í björgunarsveitum. En einnig er hægt að fá reynslu á þeim námskeiðum sem ÍFLM & ÍSALP reka, á námskeiðum erlendis eða með ástundun fjallamennsku. 

Fyrirtækið leitar að einstaklingum sem hafa nægilega tæknilega færni til að hreyfa sig af öryggi á jöklinum, geta framkvæmt einfaldar sprungubjarganir og tekið þátt í flóknari aðgerðum sem hluti af liðsheild. Viðkomandi verður einnig og ekki síður að vera fær um að skemmta gestum sínum, fræða þá og tryggja öryggi þeirra í krefjandi landslagi. Verkefnum til einstakra leiðsögumanna er úthlutað í takti við getu og reynslu. 

Þeir sem hafa áhuga á að gerast hluti af ÍFLM teyminu eru hvattir til að senda grunn upplýsingar um sjálf sig og þekkingu / reynslu í fjallamennsku á  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. . 

Athugið að starfið hentar báðum kynjum. 

Það að hafa meirapróf og að hafa lokið Fyrstuhjálp í óbyggðum telst mikill kostur. 
Gerð er krafa um góða ensku kunnáttu og kunnátta í öðrum tungumálum er mikill kostur. 

Nánari upplýsingar um verðlaunað þjálfunarkerfi ÍFLM má finna hér: http://www.fjallaleidsogumenn.is/Umokkur/Menntunogrettindileidsogumanna/

Vinna hjá ÍFLM yfir sumarið gefur einnig tækifæri á vetrarvinnu sem getur verið hvort sem er um helgar eða fullt starf fyrir rétta aðila.
Þeir leiðsögumenn sem hafa hæfileika á sviði klifurs, skíðamennsku og tungumála eiga góða möguleika á að geta síðar unnið í krefjandi verkefnum tengdum sinni sérhæfingu - svo sem lengri gönguferðum, fjallaskíðun og ísklifurleiðsögn. 

Alferðadeild er einnig að leita að þýsku og frönsku mælandi leiðsögumönnum í lengri ferðir. Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.  tekur við umsóknum og gefur upplýsingar um störf í alferðadeild.