Búið er að leggja göngubraut um Leirunar. Upplagt að dusta rykið af gönguskíðunum og teygja úr sér. Vantar talsvert í brekkurnar ennþá.

Það getur svo sem allt gerst næstu daga. Spáð er svölu áfram og talsverðri úrkomu. En spá er bara spá. Sjáum hvað setur.

Kv. Árni Alf.

Er komið nóg til að hæka og renna sér eina línu án þess að eyða 10:1 mín af rennsli í P-tex?

Sissi

Aðfaranótt mánudags koma skil upp að landinu. Í þeim gæti leynst efnið sem þarf í traustan grunn. Myndi bíða með rennsli a.m.k. þangað til.

Kv. Árni Alf.

Olræt, takk fyrir það Árni. Alltaf frábært að hafa okkar mann þarna uppfrá, munar að fá upplýsingar sem maður treystir.

Kveðja,
Sissi

Smá update og fróðleikur úr Bláfjöllum.

Nú er þriðji dagur sem toglyftur eru keyrðar á Suðursvæði fyrir æfingar skíðafélaganna. Þannig vill til að í sumar var klárað að girða Suðursvæðið. Í því felst að girðingar eru samfelldar og ná niður alla brekkuna. Ef ekki væri fyrir þessar breytingar þá væri ekkert opið.

Nýr spiltroðari sem ekki spólar í brekkunum ( rótar ekki upp grjóti) og ýtir jafnmiklum snjó hvort sem farið er upp eða niður er til mikilla bóta.

Ef búið væri að fullgirða Norðurleiðina, lífæð skíðasvæðisins, þá væri svæðið opið almenningi. Á neðri hluta hennar þar sem búið er að girða báðum megin er nægur snjór. Þar ofan við er girðing bara öðru megin sem safnar eingöngu snjó í austlægri átt.

Ef það blæs vel úr þeirri átt ásamt einhverri úrkomu safnar þessi girðingin fáranlega miklu efni á engum tíma og leiðin dettur inn. Verði eingöngu suðvestan átt á næstunni þá verður áfram snjólaust á þessum kafla.

Það vantar því bara nokkur hundruð metra af girðingu og svæðið er opið almenningi. Það er í kortunum að klára þetta næsta sumar. 100 m af snjógirðingu kostar rúma milljón með öllu.

Suðurgil og Kóngsgil sem voru (fyrir tíma snjógirðinga) alltaf fyrstu brekkur til að koma inn eru nánast auðar.

Á höfuðborgarsvæðinu býr 2/3 hluti þjóðarinnar. Akkilesarhæll Bláfjalla er að almenn opnun þýðir þúsundir manna með misgóða kunnáttu. Margir reyndar mjög litla. Aðstæður núna eru einfaldlega of varhugaverðar fyrir slíka opnun auk þess sem of lítið svæði er í boði. Utan troðinna brauta lenda menn strax í grjóti þó allt líti óskaplega vel út. Ekki neinn burður í þessum þurra lítt veðurbarna snjó.

Almennt er kunnátta og geta skíðafólks á skíðasvæðum út á landi miklu meiri en gengur og gerist í Bláfjöllum. Auk þess sem aðsókn er á engan hátt sambærileg. Allt gerir það að verkum að hægt er að opna þessi svæði við mun verri aðstæður en ella.

Sennilega hafa mun fleiri verið á skíðum í brekkum Bláfjalla í dag en á flestum skíðasvæðum landsins. Og það er samt "lokað". Það er miklu bjartara yfir Bláfjöllum en margur heldur.


Kv. Árni Alf.

Miðvikudagur 7. des. 2011

Í gær gerði ágætis él í ca. 2 tíma. Þá var einnig sæmileg gjóla af austri. Girðingin upp á Fjalli safnaði því duglega í sig. Þessi litla úrkoma og smá gjóla gjörbreytir stöðunni. Almenn opnun er því ekkert útilokuð á næstunni.

Verið er að keyra lyftur á Suðursvæðinu eins og áður sagði. Brettafélagið fékk tvo tíma á dag s.l. helgi. Mér dettur í hug Utanbrautarfélagið í þessu samhengi.

Alveg hreint yndislegt að vera hér upp á Fjalli í stafa logni og tíu stiga gaddi þegar sólin er að koma upp. Suðurjöklarnir, Hekla, Vestmannaeyjar og Surtsey allt svo tært og í seilingarfjarlægð. Mikið væri gaman að vera á ferðalagi þarna einhvers staðar.

Kv. Árni Alf.

Föstudagur 9 des.

Hér er 14 stiga frost og hægviðri. Talsvert bætti í snjóinn í gær. Skóf duglega og snjórinn því orðin pakkaðri.

Fallegt veðrið og skyggnið glimrandi. Í norðri eru það Skjaldbreiður, Þórisjökull, glittir í Langjökul, Botnssúlur og Ármannsfellið. Maður verður aldrei leiður á að góna á þetta og láta sig dreyma.

Á morgun lítur út fyrir að það verði komin svarta bylur um hádegi. Skv. spánni þá verður talsvert mikil úrkoma. Ekkert nema gott um það að segja en opnun ólíkleg. Reynum að sjálfsögðu.

Sjáum til með Sunnudaginn.

Kv. Árni Alf.

9 des. kl. 17:30

Það er fullt tungl. Allt orðið eiturgrænt. Frábært að fara í tunglgöngu þegar svona snjór er yfir öllu. Komin smá nepja. Betra að klæða sig vel. Manni finnst bara vera komin alvöru vetur.

Kv. Árni Alf.

Frumraun mín að setja link inn á svona spjall. Annars er þetta grein sem birtist í Fréttablaðinu í dag. Sjáum til hvernig þetta gengur.

www.visir.is/breytingar-i-blafjollum/article/2011712159879

Kv. Árni Alf.

Þriðjudagur 20. des.

Seinni part sunnudags gerði hér mikla snjókomu. Um kvöldið blotnaði í þessu og fraus fljótlega saman aftur. Þarna er kominn góður grunnur og loksins hægt að skíða utanbrautar með einhverju öryggi.

Veðrið er eins og það er á SV horninu, lokað s.l. tvo daga, reyndar vegna ýtinga í gær ekki veðurs, en í dag náðum við að hafa opið frá 17-21. Engin svikin af því að mæta í Fjallið. Líklega lokað á morgun en við fáum bara enn meiri snjó í staðinn. Hér er ekkert staðviðri eins og í Hlíðarfjalli en á móti þá er náttúrulegur snjór utan sem innan brauta.

Kv. Árni Alf.

Mánudagur 26 des (annar í jólum).

Allsvakalega bætt í snjó hér yfir jólin. Þó lyftur verði lokaðar þá er nú aldeilis veðrið og snjórinn til að fara út að leika sér. Þeir sem vilja halda sig innan borgarmarkana þá eru lagðar skíðagöngubrautir um allt. Á Miklatúni, Fossvogsdal og Ægissíðu og líklega víðar.

Kv. Árni Alf.

Fimmtudagur 29. des kl: 10:00

Allsvaðaleg snjókoma og búin að vera í alla nótt. Púðrið sem allir hafa verið að bíða eftir. Sé nú ekki fram á opnun en örugglega gaman að fara út að leika seinni partinn eða í kvöld þegar birtir upp og lægir. Sýnist eitthvað skítviðri í spánni á morgun svo um að gera að nýta þetta. Eflaust talsverð snjóflóðahætta.

Kv. Árni Alf.

Skinnaði 2 ferðir í gær í Bláfjöllum niður Kóngsgil með konunni. Hart efst, síðan skafið og loks púður í restina. Vegurinn var sennilega fær svona 35" bílum. Splitboard og Light and Motion hafa gjörbreytt leiknum.

Beisið í Bláfjöllum er orðið massíft. Þessi úrkoma um helgina sýnist manni að gæti nú alveg komið að miklu leyti sem snjókoma það er rétt spáð yfir frostmarki þarna í nótt.

Væri gaman að fá fréttir af Móskarðahnjúkum og öðru utanbrautarstöffi, spurning hvort það fer ekki bara að detta inn eða hvort það er allt fokið.

Nýársdagur kl: 12:30

Flott færi, púður hér yfir öllu. Reyndar er til léttara púður. Hefði mátt snjóa í kaldara veðri. Skyggnið reyndar hálf slakt í augnablikinu (ástæðan fyrir að ég er kominn í tölvu). Annars búið að vera brilliant en bara opið til 16:00. Eftir það er um að gera að skinna. Sama færi alls staðar í fjallendi á þessum slóðum.

Kv. Árni Alf.

Nýársdagur kl. 18:00 Það brast á með bullandi snjókomu ofantil í Fjallinu uppúr hádegi. Er aðeins farið að stytta upp núna. Vonandi einhver hafi notið nýsnævisins þó skyggnið hafi ekki verið upp á marga fiska.

Kv. Árni Alf.

PS Svo eru menn að tala um snjóframleiðslu ;)

3 jan. kl: 11:00

Hörkugóður dagur í gær fyrir utanbrautarskíðun og veðrið maður. Enn ágætis utanbrautarfæri. Menn hljóta að finna þetta færi um allar trissur hér SV lands. Annars á eitthvað að bæta í vind í dag og á morgun verður líklega komin austan bylur. Færið á því eitthvað eftir að breytast, kannski til bara batnaðar.

Magnað að sjá sólina koma upp rétt sunnan við Surtsey. Fjallahringurinn bókastaflega logar.

Kv. Árni Alf.

20. jan. 2012 kl. 22:00

Byrjaði að snjóa duglega og blása um níuleytið í morgun. Rétt fyrir hádegi slotaði úrkomunni og komið var allsvaðalegt nýsnævi, þrælfínt púður. Geggjað utanbrautarfæri.

Reyndar hafði snjóað svo duglega að þrjú snjóflóð höfðu fallið niður í skíðaleiðir á suðursvæðinu. Eingöngu eftir ca. tveggja tíma snjókomu og skafrenning. Þetta er ekki lengi að gerast. Sæmilega efnismiklar spýjur.

Þar sem flóðin höfu fallið var bara bert harðfennið eftir í hlíðinni. Vorum í kvöld að ýta við hengjum þarna á svæðinu. það hélt áfram að mygla niður í allan dag. Ef ekki hvessir of mikið ætti skíðafæri utanbrautar að haldast gott. Er hæfilega bjartsýnn.

Kv. Árni Alf.

Mikið kann ég vel að meta innlegg fréttaritara ÍSALP í Bláfjöllum :)

Þriðjudagur 24. janúar.

Annar fréttaritari þar sem Árni er forfallaður.

Gaman að vinna í Bláfjöllum þessa daganna. Þar snjóar dag eftir dag. Brekkurnar verða sífellt styttri vegna nýrra snjólaga, því miður er ekki hægt að færa lyfturnar ofan á ný snjólög. Sífellt minnkar plássið fyrir allan þennan snjó og langar mig að biðja fólk að taka eitthvað af honum með sér heim, geyma í frysti og koma með aftur í fjallið þegar okkur vantar, sennilega verður það í kringum 17. júní.

Dagurinn í dag var sérstaklega góður þegar flóðlýsingin naut sín seinni partinn og skíðamenn voru lausir við snjóblindu sem ríkti fyrri partinn. Það er betra að sjá aðeins þegar skíðað er í púðri upp fyrir axlir (miðað við fréttaritara) sem sagt upp að hné fyrir meðalmann. Búast má við ennmeiri snjókomu á morgun. Fylgist endilega með veðurspánni og takið ykkur frí í vinnunni eða skóla þið eigið það skilið.

Jafnframt er rétt að minna á hlut sem Árni hefur áður minnst á áður en það eru snjóflóð. Í dag var talsverðum tíma varið í að losa snjóhengjur, með troðara, sem hafa síðustu daga safnast vestan megin við Kóngslyftu (nýja stólalyftan). Þessi hengja var nánast samfellt útað suðursvæði, misdjúp þó. Úr henni hafa fallið nokkur flóð þ.á.m. eitt sem náði langleið niður að Ömmu dreka, sem er barnalyftan staðsett næst Gosanum á suðursvæði. Í hengjunni mátti finna laus snjólög 2 metra djúp ofan á hjarni, fínn kokteill það....

Föstudagur 27. Jan. Kl. 10:00

Nú er þreifandi bylur í Bláfjöllum og sjálfsögðu lokað eins og í áhlaupinu í gær. Ansi umhleypingasöm spá fyrir næstu daga og örlítil hlýindi. Já það er ekki heiglum hent að reka skíðasvæði hér á SV horninu þrátt fyrir nægan snjó.

Minnir dálítið á veturinn í fyrra. Þá var mesti snjór í a.m.k. áratug en lítið opið vegna umhleypinga.

Annars geta menn varla kvartað. Utanbrautarfærið hefur farið sífellt batnandi í rúma viku og endaði með púðri upp í mitti í fyrrakvöld.

Mikilli snjókomu fylgja gjarnan snjóspýjur af ýmsum stærðum og gerðum sem gott er að gefa gaum. Ekkert síður þessum litlu. Oft er erfitt að sjá þetta fyrir. Gerist á sakleysislegustu stöðum.



Kv. Árni Alf.

1. feb. 2012 kl:14:00

Mikið snjóað hér í nótt. Ætti að vera næg mjöllin utanbrautar. Um að gera að nýta sér þetta. Gengur hér á með éljum. Gullfallegt inn á milli élja í sólinni. Skítviðri á morgun.

Kv. Árni Alf.

Góður dagur í dag Bláfjöllum þrátt fyrir allt.

Honum má líkja við að undirbúa sig fyrir annars einfalda aðgerð en enda á því að framkvæma flókna heilaskurðaðgerð í gegnum nafla sem reynist fullur af eldgömlu naflakuski.

Oft þurfa starfsmenn Bláfjalla að lemja ís af einstaka staur í einstökum lyftum til að koma þeim af stað. Í dag kom mikil ísing okkur að óvörum var hún þannig að nánast þurfti að príla í hvern staur og berja ís. Var þar á ferð mikill gæða ís sem vel hefði sómað sér í görrótumdrykkjum sem Ísalparar kunna góð skil á og verður ekki nánar farið í þá sálma hér. í ísingu sem slíkri verður útleiðni og getur reynst erfitt að finna hana, fer ekki nánar í það enda enginn snillingur í því. Fyrsta gengið sem mætir er að koma kl. 06:30 í Bláfjöll og dugar þesi tími okkur í flestum tilvikum.

Að lokum komust þó flest allar lyfturnar, í gang og nutu skíðamenn ágæts veðurs með fínu skyggni og færi í troðnum brautum. Utan brautar var talsverð hörð skurn sem efsta lag og ekki ákjósanlegt að detta í því, auðvelt að renna langar leiðir í bröttum og löngum brekkum. Héðan í frá fer því engin upp með lyftu hjá mér í þessum aðstæðum nema með nýbrýndar ísaxir í báðum höndum ....

Stefán, þú hefir átt að láta vita... hefði alveg verið til í að taka smá stauraklifur í dag (ath að ég segi dag en kl. 6:30 er nótt).

mbkv,
GFJ

17. feb. 2012 kl: 16:00

Heiðríkja, sól og hægviðri í fyrsta skipti í a.m.k. tvo mánuði. Snjóaði duglega í gær og nótt í SV éljum. Norðan megin í hlíðum er því geggjað utanbrautarfæri. Í Kóngsgilinu er þetta undir og sunnan Kóngsins neðantil í fjallinu. Það væri æði ef Suðurgilið væri opið. Þar er púður upp í mitti eins og alltaf í SV átt. Annars er þetta glerhart allt saman. Alveg þess virði að skjótast á skíði í dag.

Spáð stífri norðanátt svo þessi lausasnjór á líklega alveg eftir að hverfa úr Fjallinu í nótt. Þá verður fátt um fína drætti utan brauta. Bót í máli er að það snjóar á Sunnudaginn.

Kv. Árni Alf.

Mánud. 20. feb 2012 kl: 18:00

Mikið snjóaði í gær og dró í skafla. Í sólinni í dag var þetta ansi fallegt á að líta. Færið utanbrautar er hins vegar erfitt. Sums staðar svínhart annars staðar að myndast skel ofan á nýsnævinu eða sköflunum. Flott að láta ísnálarnar rúlla á undan sér í sólinni áður en maður rúllaði sjálfur. Fallegasti dagurinn í vetur.

Kv. Árni Alf.

P.S. Troðari yfirgaf svæðið í dag og fór í Skálafell til viðbótar troðaranum þar. Allt að gerast.

Ég náði þrælfínum beygjum utan brauta í Eldborgargili í kvöld.
Eitt skrýtnasta færi sem ég hef rennt mér í, helvíti fínt á bretti.
Ísnálalagið sem var örugglega hálfur cm á þykkt leit út eins og botnin á glermunum úr Ultima Thule línu Iittala...
Verður forvitnilegt að sjá hvernig það þróast þegar það snjóar ofan á þetta undarlega lag sem ég ætla kalla funky stuff.

Fimmtudagur 1. mars 2012 kl: 17:00

Morguninn bjartur og fallegur. Svo þykknaði upp og búið að snjóa mikið. Fínasta púður og utanbrautarfæri. Það sem eyðileggur þetta er snjóblindan. Gærdagurinn var eins. Snjóaði mikið og frábært færi. Þurftum reyndar að loka fyrr eins og allt stefnir í núna í dag.

Annars er búið að snjóa fáránlega mikið síðustu vikuna. Þessu fylgja ýmis lúxusvandamál. Annars mætti allt þetta efni dreifast á fleiri ár.

Kv. Árni Alf.

Föstudagur 2. mars kl. 18:00

Keypti Moggann í Bónus núna áðan.

Las að febrúar hafi verið óvenju hlýr og úrkomusamur um land allt. Í Reykjavík var hitinn 2,2 gráðum yfir meðallagi. Þetta er áttundi hlýjasti febrúar frá upphafi mælinga í Reykjavík. Merkilegt nokk þá hefur manni fundist hitinn í Bláfjöllum sjaldnast komast yfir frostmark. Sýnir kannski vel hvað lítið er að marka það sem manni finnst.

Svo eru það stærstu jarðskjálftar í nágrenni Reykjavíkur. Annar 1929 og hinn 1968. Annar 6 á Richter og hinn líklega 6,5. Sé ekki betur en þeir eigi upptök við suðurenda skíðasvæðisins. Gott að eiga góða granna. Annars dreymir mig alltaf um lítið fallegt túristagos í Strompunum sem eru fallegir gígar við skíðasvæðið.

Segið svo að ekki það sé ekkert merkilegt í Mogganum. Nema hann ljúgi þessu öllu!

Kv. Árni Alf.

Sunnudagur 4. mars 2012 kl:8:00

Hér er logn, léttskýjað og frost 6 stig. Bendi mönnum á gönguskíðabrautirnar. Liggja um Strompana og út í Grindarskörð.

Stromparnir eru gullfallegir gígar hér rétt við bílastæðin. Um að gera að fara af skíðunum og leika sér í þessum gígum. Þarna eru líka stærðar holur sem gaman er að skoða.

Talsverður spotti er svo út í Grindarskörð. Þar er landslagið ævintýralegt. M.a. gígar af öllum stærðum og gerðum. Sama þar. Fara af skíðunum og skoða gíga og holur.

Ef veðrið helst gott þá er alveg þess virði að skoða þetta. Ekki sakar að hafa heitt á brúsa og smá nesti meðferðis.

Kv. Árni Alf.

Frábært framtak Árni. Fór hringinn út í Grindarskörð áðan og útúrdúra til að skoða gíga. Tær snilld. Gott færi, sólskin og logn.

Föstudagur 16. mars kl.12:00

Snjóar hér í hæglætisveðri. Púður yfir öllu. Undir er hörð skel. Búið að vera blint í snjókomunni en glorious þegar sólin kemur. Svaðalegt færi. Menn mega samt vara sig á að undir og kringum stólalyftur getur verið gróft glerhart landslag.

Það hefur nefnilega þurft að ýta undan lyftunum svo stólarnir rekist ekki í jörð. Vonandi eru allir að fara eða komnir á Telemarkfestivalið svo ég vona ekki að neinn mæti í Fjallið.

Kv. Árni Alf.

Update kl: 14:00 Þetta er alveg svívirðilega geggjað.

Miðvikudagur 21 mars kl: 17:00

Loks opið eftir fimm daga lokun. Svona er nú gangurinn í þessu. Spurning hvort snjóframleiðukerfi hefði ekki kippt þessu í liðinn:)

Utanbrautarfæri er slæmt, glerhál ísskel ofan á nýsnævi. Aðfaranótt mánudags gerði nefnilega eina mestu snjókomu vetrarins og var ekki á bætandi. Það blotnaði í þessu lagi og það hefur ekki náð að frjósa almennilega. Annars er hláka framundan. Spurning hvað hún stendur lengi.

Kv. Árni Alf.

Skálafell 21. mars

Sama saga, greinilega töluverð úrkoma, þungur blautur snjór, og þetta hefur frosið. Ansi hart en þetta var samt worth it, gott veður og svona.

31 mars kl: 11:00

Ekkert betra en drífa sig á skíði í svona tíð. Hér er hægviðri súld og fínasta skíðafæri. Bæði innan og utan brauta. Þó eitthvað súldi þá er það bara hressandi.

Annars hafa síðustu opnunardagar verið bara ágætir. Þoka reyndar að mestu en hvað er dýrlegra en þegar maður kemst upp úr henni í sólina eða tunglskinið og stjörnudýrðina og horfir niður á skýjateppið fyrir neðan.

Snjóleysi er ekkert vandamál hér þó það sé orðið það á flestum stöðum úti á landi.

Annars er það fréttnæmt að lokað er í Skálafelli vegna dimmrar þoku. S.l. laugardag var hins vegar opið í Skálafelli og lokað hér. Svona er þetta sitt á hvað.

Update kl: 12:00 Súldin stóð nú stutt við. Nú er farið að birta og sést orðið niður í miðbæ. Vonum að þetta haldist svona út daginn.

Kv. Árni Alf.

3 apríl kl: 16:00

Hitinn kominn upp fyrir frostmark og því komið þetta eðal utanbrautarfæri. A.m.k. fyrir þá sem ýmist nenna þessu varla eða geta. Þunnt mjúkt lag ofan á hörðum grunni. Fallegt vorveður og sólin meira að segja að glenna sig.

Talsverð breyting á færinu frá í gær. Þá var talsvert frost og Fjallið eitt gler. Svo hart að sumir sem duttu fóru á svo mikla siglingu að þeir fengu brunablöðrur. Sjaldgæf meiðsl hér um slóðir.

Göngubrautir um allar trissur. Og ekki vantar snjóinn í fjöll á þessum slóðum.

Kv. Árni Alf.

10 apríl kl: 14:00

Skrambi fallegt veður og skyggni. Reyndar búinn að vera bölvaður belgingur uppi á Fjalli en spáin gerir ráð fyrir að það lægi. Búið að vera frost í nótt þannig að utanbrautar er þetta enn glerhart. Geri ráð fyrir að þegar lægi þá taki sólbráðin við og færið gæti orðið gott.

Allt sem er í skjóli hefur orðið sólbráðinni að bráð og menn ættu að geta fundið einhverjar eðallínur til að skíða á þessum fallega degi a.m.k. þegar líður á daginn.

Í austri á Suðurjöklum og Heklu er einhver móða sem virðist vera að bæta í.

Minni á gönguskíðabrautirnar. Ekki amalegt útsýni.

Skítviðri á morgun en svo lítur þetta þokkalega út a.m.k. út vikuna.

Kv. Árni Alf.

13 apríl kl. 11:00

Hér snjóaði og skóf í stífri austan átt allan miðvikudaginn (10. apríl), fram á gærdaginn. Talsvert myndarleg þurr flekaflóð féllu hér niður í skíðbrekkur. Einnig var stuggað við þessu með troðara. Flekinn var a.m.k. 1,5 metra þykkur þar sem hann var þykkastur. Allt laflaust ofan á glerhörðum gömlum snjó.

Það er a.m.k. nýsnævi hér innan sem utanbrauta. Þetta fína veður, sól í hófi og nánast logn.

Kv. Árni Alf.

14 apríl kl. 14:00

Hér myglaði niður örlitlum snjó í morgun. Svo blotnaði aðeins í þessu. Gerði þá eitthvað sem ég kalla ágætt færi. Það er blautur snjór ofan á hörðu lagi. Annars hefur verið hálf grámyglulegt hérna í dag þó veðrið sé fínt.

Allt nýsnævið sem skíðað var í döðlu í gær er nánast óskíðandi. Svo sem ekkert ný saga. Bara finna sér óskíðað svæði.

Hrakviðri spáð a.m.k. í Bláfjöllum næstu daga.

Update kl: 17:00 Létti til og gerði þessa bongóblíðu uppúr kl. þrjú. Synd að þurfa að loka núna þegar þetta er loks orðið gullfallegt í síðdegissólinni.

Kv. Árni Alf.

17 apríl kl. 10:00

Alveg glerfínt veður, léttskýjað og logn. Enn tveggja stiga frost og harðfenni en sólbráðin fer að mýkja þetta. Reikna með eðalfæri uppúr hádegi.

Reyndar segir skýjahuluspáin að mögulega þykkni upp seinni partinn. Annars spáir léttskýjuðu og hægviðri næstu daga með talsverðu næturfrosti. Það ætti því að verða eðalfæri hvar svo sem menn skíða.

Og ekki ætti að vera amalegt að fara á gönguskíðum eitthvað með heitt á brúsa, samloku og súkkulaði.

Annars er einhver móða fyrir austan, á Suðurjöklum og Heklu en bjart í norðri.

Hvet menn til að nýta þessar góðu aðstæður.



Kv. Árni Alf.

Það voru ágætarð aðstæður um kl. 19.00 en sýnu betri um 19.30 þegar sólin tók að skína. Fínar aðstæður í sólinni í kvöld þegar meyrna tók. Mæli með að fólk skelli sér á morgun í sólinni, nægur snjór!

18 apríl kl. 10:00

Já Ingimundur það var fallegt í kvöldsólinni í gær. Og ekki er þetta verra nú í morgunsólinni. Lítur út fyrir fallegan dag.

Það snjóaði örlítið í nótt og dró í hugsanlega brúklega skafla. Talsvert frost ennþá og smá gjóla. Á að lægja þegar líður á daginn. Sólbráðin ætti að fara að gera vart við sig uppúr hádegi með fínu færi.



Í austri er er orðið bjart yfir Heklu og Eyjafjallajökli. Annars lítur þetta býsna vel út næstu daga.

Kv. Árni Alf.

19 apríl kl. 10:00

Gleðilegt sumar öll sömul. Hérna fraus vetur og sumar saman líkt og almennt gerir milli daga þessa dagana.

Annars er hér bongóblíða eins og undanfarna daga og lítt meira um það að segja.

Gott að vera á gönguskíðum í dag.

Þungskýjað er í austri yfir Heklu og Suðurjöklum en bjart í norðri.

Kv. Árni Alf.

20 apríl kl: 10:00

Stafalogn og heiðskýrt hér uppi á Fjalli. Og skyggnið alveg mergjað.

Spáin fram í næstu viku gerir ráð fyrir sama veðri. Léttskýjuðu, hægviðri og talsverðu næturfrosti. Held að menn ættu að nýta sér þessar kærkomnu aðstæður til skíðaferða.

Kærkomin tilbreyting frá öllu hrakviðrinu í vetur.

Bjart í austri yfir Suðurjöklum og Heklu, norðri yfir Skjaldbreið og jöklunum norður af svo og vestur á Snæfellsjökli.

Kv. Árni Alf.

23 apríl kl. 12:00


Frábær helgi að baki. Aðsókn góð a.m.k. miðað við árstíma. Yfir þúsund manns hér í gær og litlu minna á laugardag.

Stefnir í enn einn góðviðrisdaginn. Nokkur hundruð skólakrakkar þegar mættir og una sér vel.

Þó heitt sé yfir hádaginn þá er frost hér á kvöldin og fram undir hádegi. Það sér því ekkert á snjónum. Fer reyndar eftir veðri en hér verður fínasta skíðafæri a.m.k út maí og hugsanlega lengra fram á sumarið.

Kv. Árni Alf.

27 apríl kl. 12:00

Hér er nú að byrja "fun race" í Borgarbrekkunni. Þarna keppa mörg þekkt nöfn úr skíðaheiminum, m.a. margfaldir heims- og ólympíumeistarar í alpagreinum. Þetta eru mestmegnis austurríkismenn að auglýsa heimsmeistarkeppnina í Austurríki næsta vetur.

Þetta lið kann best við sig utanbrauta enda ágætis færi þar. Blautur nýr snjór í bland við gamlan. Fínasta veður og sólin meira að segja að glenna sig.

Kv. Árni Alf.

11. maí 2012

Það hafa ekkert verið neinir eðlilegir dagar í Fjöllunum undanfarið. Alveg frá fyrsta lokunardegi (1 maí) er búið að vera léttskýjað, logn og magnað skíðafæri.

Venjulega talsvert frost frá kveldi og fram undir hádegi. Harðfenni fram að hádegi en svo geggjað færi í sólbráðinni seinni partinn. Og snjórinn minnkar sama sem ekkert þessa daga.

Æfingar og innanfélagsmót hjá skíðafélögunum hafa verið keyrð þessa daga. Eitthvað brettasession er fyrirhugað á miðvikudagskvöldið auk æfinga og einhver mót eru eftir. Ekkert útilokað að stólalyfta verði keyrð einhvern daginn fyrir almenning ef veðrið verður skikkanlegt.

Helst hefur orðið vart útlendinga hér undanfarið ýmist þeirra sem aldrei hafa séð snjó eða þeirra sem eru á fjallaskíðum. Hvet þá sem hafa lítinn tíma aflögu til lengri ferða að kíkja í Fjöllin. Hvort sem er til brekkuskíðunar eða gönguskíðaiðkunar. Nema hvorutveggja sé. Hvernig er þetta annars. Kann engin að telemarka á gönguskíðum lengur? (Bara vesalingar sem ekki geta það)!

Annars er spáð fimubulkulda eftir helgi og stórhríð fyrir norðan.

Ætti að vera nægur snjór til snjóhúsagerðar talsvert fram á sumar.

Kv. Árni Alf.

P.S. Var annars að koma úr Hlíðarfjalli. Sama sagan þar. Fínt færi undanfarna daga og nægur snjór ofan við 700 m hæð. Reyndar hefur bætt talsvert í snjó ofan 1000m.

16 maí 2012 kl: 15:00

Sama bongóblíðan komin aftur eftir nokkurra daga norðan hvassviðri og kulda. Hér er hægviðri og heiðskýrt. Talsvert frost í nótt en sólbráðin er búin að mýkja þetta nokkuð vel.

Kl. 17:00 byrjar hér brettasession. Búið er að byggja alls konar palla, risastóra og smáa og rail, box og rör eru komin á nýja staði í Fjallinu. Kóngurinn verður keyrður og getur hver sem er nýtt sér það (reyndar gegn 2000 kr. gjaldi, sjá nánar heimasíðuna). Opið til 21:00

Annars minir þetta meira á sólarströnd en skíðasvæði. Uppi í brettagarði eru sólhlífar, borð og stólar og skíðað er undir dynjandi músík einhvers DJ Danna. Og veðrið gefur Kanarí ekkert eftir.

Kv. Árni Alf.